樂園牛丸大王 (已結業)

由 o係花園街(金聲斜對面)出現之後，一直食到宜家，我都唔知食左幾多年喇~~，絕對係忠心 fans，之前住得近，經常食，收工總會食一碗先返屋企，宜家搬左入新界，雖然少左，但多年留落黎既味道記憶，絕對無減。轉左亞仔做揸fit人之後，裝修變，員工變，廚房變，食物品質變！以前好有潮洲魚蛋粉風味，店內裝修雖然舊，員工招待雖然唔係殷勤 (其實都唔需要)，勝在食物品質好，繁忙時間總係人頭湧湧，要等位，一碗魚蛋粉，快食快閃，何需裝修？何需殷勤？魚餃..係我最愛...每次必叫...自從出現黑椒牛丸後.....黑椒牛丸魚餃河就成為我每一次去都係咁叫既一碗粉，宜家只成為最懷念既一碗正中潮洲粉。宜家...魚餃變了，牛丸亦都變成普通街市都買到既品質，細粒又唔彈、無牛味。我老公話：牛腩變左柱候牛腩，唔再潮式了！這是代表改朝換代嗎？樂園爸爸，你可有考慮開返一間o黎滿足我地呢群 fans ？