奇華餅家 (中港城)

營業中

休息中

今次依一篇「好友狂嚐曲」有少少抽水之嫌，皆因想分享嘅兩款食物，都跟曲奇無直接關係，只喺之前寫過帝苑餅店 Fine Foods嘅蝴蝶酥，都當為餅店嘅曲奇系列。今次，都品嚐咗奇華餅家嘅蝴蝶酥，就插咗入「好友狂嚐曲」系列中寫埋。若非朋友所送，都真喺唔知原來奇華都有出蝴蝶酥，而今次收到嘅喺黑白芝麻蝴蝶酥，一包只有8件，睇落似模似樣，入口牛油香味突出，又有芝麻香，口感亦都好鬆脆，不過，明顯都睇到酥皮嘅摺紋唔算細緻，故此，酥化度仍可以再做好啲。如果唔太貴嘅話，都好值得試吓，而我，滴漏杯肯亞咖啡，就一次過食晒成包當下午茶。至於另一包黑芝麻雞蛋卷，無獨有偶，同樣喺奇華餅家嘅產品，不過，喺另一位朋友所送，依包就拎咗返屋企當口痕痕時嘅零食。奇華做開依類中式糕餅，所以，雞蛋卷難佢唔到。雞蛋卷內嘅黑芝麻唔喺好多，所以，蛋卷都喺以蛋香味為主，咬落好香脆，不其然，好快半打雞蛋卷就放入肚內。寫咗幾篇「好友狂嚐曲」，又喺時候抖一抖，下次再有曲奇食評先再次分享！補多句，真心多謝朋友們、食友們不時送我曲奇，等小分久唔久又可以寫吓依個系列。