桜

營業中

休息中

下晝約左人去元朗行街，點知朋友遲到，唯有自己周圍兜下。經過又新街見到嚟間手卷店，門面都幾乾淨，而且難得唔會有一般外賣壽司店嘅魚腥味，一於就入去試下。望一望個餐牌有成四五十種手卷，我諗到諗唔到嘅配搭都有齊曬，諗左好耐最後揀左係雪櫃望落好新鮮嘅三文魚配埋我平時最中意嘅海膽。隔住個簾，隱隱約約見到師傅係後面包手卷，雖然都有唔少人等緊，但係師傅手腳都好快，等左一陣就有得食。手卷好足料，海膽大大粒加埋三文魚，望到已經流曬口水。海膽鮮味好濃，一d腥臭味都無，正！ 但令我眼前一亮嘅係佢d三文魚，佢d三文魚絕對係我試過最好味嘅！第一淡咬落去已經feel到同平時食到個絕對唔同級數，三文魚香味極濃而且一d都唔會感覺好油膩，搞我我都忍唔住買多左個三文魚丼。三文魚丼有三種唔同煮法嘅三文魚，一次過滿足我三個願望。三種三文魚各有特色，我自己最中意嘅就係燒三文魚，輕輕燒熟左個面，令三文魚嘅香味再提升一個層次。而且雖然價錢唔貴，但依然足料，三文魚鋪滿曬成個飯面，中間仲有幾片牛油果同埋三文魚籽，比我一種清新嘅感覺。雖然我仲係覺得未夠喉想繼續食，奈何真係太飽，唯有留返下次。