茶記冰室 (已結業)

以前中學喺石蔭附近，果陣成日去唔同嘅餐廳食嘢。今日咁啱去附近拎野，見到開咗好多唔同嘅新餐廳，就嚟呢間試吓啦。 呢度嘅環境好靚，有唔少傳統嘅裝飾，環境又夠大，位置好好坐，比一般嘅茶記氣氛環境好好多。呢幾日咁凍梗係要食煲啦，羊腩煲定雞煲諗咗好耐，最後聞到人哋隔離枱嘅雞煲好香，咁就叫一個麻辣雞煲啦。雞煲一上枱真係超級香，我哋叫咗個中辣，辣味啱啱好，個汁撈飯食就最夾啦。之後仲叫咗條清蒸龍躉，條魚蒸嘅時間啱啱好，魚質好滑，一食就知道好新鮮。蒸魚豉油又係最啱撈飯，忍唔住食左成碗呀。去茶記梗係要飲凍檸茶啦，呢杯凍檸茶唔會太甜，茶味又夠，非常解渴呀。呢間茶記環境又好，又夠抵食，就算唔順路都可以嚟一試啊。等我下次加埋啲中學同學一齊黎再食過先。