SAYAM Thai/Bar (已結業)

今日約咗朋友仔一齊出去銅鑼灣，我哋6點就已經去到餐廳，好開心餐廳安排咗我哋坐喺大玻璃嘅窗口位，未天黑，採光好，環境好靚，打卡一流。柚子沙律柚子酸酸甜甜，味道清淡香甜，唔太酸，加入左芫荽同埋乾辣椒，混合少少鹹嘅醬汁，提升左成個沙律嘅層次，仲有4片大帶子，作為前菜，好開胃，值得推薦。海鮮拼盤拼盤有三種唔同海鮮，有一大條魷魚，好爽口，唔會硬同韌，加埋特製醬汁，燒得好入味。特別推介鱔魚串燒，用料上乘，好厚身，燒出嚟好入味，個皮仲係脆卜卜。好大隻虎蝦，已經切開咗一半，好容易就食到。燒菠蘿炒飯賣相好靚，有一大隻蝦喺個飯上面，個飯份量好多，燒菠蘿好甜，配埋豬肉鬆同埋腰果，口感一流。燒海鱸魚魚嘅份量都好大，上枱嘅時候已經好香，佢已經切開左上面層皮，食嘅時候好方便，魚肉好滑，好清甜，有陣時食到少許鹽粒，更加出味。炒西蘭花椰菜花蒜蓉味炒得好香，菜無草青味，唔會好林，爽口入味。食物價錢少少貴，但如果用OpenRice訂位有八折，仲免加一，食物份量其實都比平常多，味道美味，計落都相當抵食。仲叫咗兩杯mocktails ，味道清甜易入口，傾偈一流。我見到佢個午餐餐牌都係60幾蚊一碟，下次一於去食午餐。