拉麵太郎 (已結業)

由於我同屋企人都非常鍾意食日本菜，今次約埋試食呢間由朋友介紹嘅「拉麵太郎」，地點非常方便，就响灣仔道利景酒店隔離。當日天氣有啲涼，我點咗新登場嘅生薑拉麵，叉燒肥瘦適中，湯底濃但唔算好油，麵嘅軟硬度又啱啱好，加埋生磨嘅薑蓉，食完成個人暖晒，感覺非常滿足😋男友點咗味噌湯拉麵，其實唔算辣，味噌仲非常惹味，平時食嘢幾腌尖嘅佢居然話幾好味，質素拍得住响日本食嘅拉麵，好快成碗KO晒！老豆點咗牛肉丼，佢勁讚牛肉超入味，又嫩又腍又多汁，加埋日本米，比較起一般日式餐廳嘅牛肉丼更地道更出色😋至於亞媽點嘅太郎豚骨咖哩丼，同日本家庭式餐廳嘅日式咖哩好相似，香、甜、但唔辣，料多汁多，亞媽都好滿意👍🏻小食方面我哋叫咗芽菜、半熟味附蛋、炸薯餅同埋薯仔沙律，我哋覺得芽菜同薯仔沙律最好味👍🏻整體嚟講，味道唔錯，好正宗嘅日本拉麵，其他料理都做得相當出色。日籍老闆招乎殷勤周到，價錢非常合理，相比銅鑼灣區一啲過百蚊碗但又細碗嘅拉麵，呢度真係真材實料，好味又抵食😋👍🏻 我同屋企人都會再嚟幫襯😉