Theo Mistral by Theo Randall (已搬遷) 新店位置

去得酒店staycation，就梗係去埋佢哋嘅餐廳食晚飯啦❤️ 晚餐位置响2/F嘅 Theo Mistral by Theo Randall，呢個package包嘅係一個三道菜嘅晚餐喺上頭盤之前就先送上熱辣辣嘅新鮮麵包同麵包條，包痴母女一見到就心心眼，阿女仲食咗3個添！上前菜喇，係煙三文魚沙律配意大利蕃茄、紅菜頭及阿瑪爾菲檸檬汁，有舖滿成隻碟嘅挪威三文魚加上意大利嘅蕃茄仔同紅菜頭三文魚份量一啲都唔少，配埋醬汁嚟食，少少酸之餘好開胃之後主菜分別有慢煮鵝肉雲吞同煎焗意大利海鱸。先講海鱸魚，先焗再煎，肉質鮮嫩，魚皮煎到金黃色，仲脆嘅添，海鮮原味出晒嚟，再配上炒菠菜，西蘭花同露筍，看似簡單，但要整到咁好味，一啲都唔易！而慢煮鵝肉雲吞，用上自家製嘅雲吞皮，餡料嘅鵝肉係比較少食得到，加上意式煙肉同巴馬芝士，味道香濃得嚟又唔好膩，而牛肝箘同羊肚菌吸收晒醬汁嘅精華，非常入味。食完主菜，仲有Haagen Dazs馬卡龍系列嘅雪糕新地，仲可以一次過試晒三隻味添！最後仲有開心果奶油卷同埋意式軟牛軋糖做warp up，又係滿足嘅一餐。