泰地道 (文苑樓) (已結業)

因為要去圓方睇戲，所以係附近搵食，之前食過一次都覺得野食唔錯，有一貫九龍城泰菜水準，今次無諗咁多再食一轉。不過可惜今次預錯份量，兩個人食嘅嘢同4個人食差好遠，係度提提大家不能叫太多，費事食唔晒浪費……加上呢間嘢都幾落力sell食燒海鮮，大家叫菜時可以留意下。🥢🍞黎到必食一定係佢個蒜蓉包，用厚多士切成條狀，面頭鋪滿蒜蓉粒，燒完又入味又脆卜卜，好有心機整（我見啲店員都有係度食😂）。🥢試咗兩隻燒扇貝，又係鋪滿蒜蓉，蓋過晒粒扇貝，可彩扇貝都厚肉，唔會太細隻，中意食蒜蓉嘅人就有福了！🥢冬蔭功湯嗌咗個細嘅，材料有大蝦同秀珍菇，酸酸尾尾帶有少少辣，食完個湯好開胃。🥢食到一半已經好滿足，口痕再嗌咗個馬拉盞炒椰菜苗同雞肉泰式乾炒河，份量好多，兩個人食厭有啲多，所以話一班人食泰菜會開心好多！唔小心點錯咗乾炒河，下次會食返濕炒。😅當晚晚市客人唔多，老闆娘都有禮貌推介餐單比我哋，最尾我地趕時間睇戲，連免費嘅飯後甜品都無食到，好似係糯米糍，個人認為廚房水準唔差，下次會再黎食！