潮福蒸氣火鍋 (已結業)

今日放工買完啲電腦用品，同朋友決定嚟潮福食晚飯。講起潮福，大家都會諗起佢嘅任點任食蒸氣火鍋，上次試過都幾好食。今日坐低睇吓個Menu，發覺原來佢都有好多小菜選擇，有燒味，海鮮同埋家常小菜，仲要全部都係街坊價。今日同朋友唔係好肚餓，就決定試吓佢啲小菜先。兩個人點左椒鹽焗鮮魷，果醬生炒骨同埋海味雜菜煲。椒鹽鮮魷炸得金黃，份量好多。鮮魷爽口彈牙，椒鹽調味剛剛好唔會太鹹好惹味，唔覺唔覺就食晒。果醋生炒骨配菜除咗有菠蘿仲有青紅椒，炒得好有鑊氣而且酸甜開胃。海味雜菜煲煮得好清甜，係健康之選。埋單兩個人都係食咗二百幾蚊，以街坊酒樓嚟講抵食之餘質素真係幾好，正宗香港風味。最後佢哋仲送埋生果，鮮甜多汁，係值得支持嘅親民酒樓。