Mee...lemongrass (已結業)

今日行銅鑼灣GU，見門口有間馬來餐廳，乾淨企理，都幾火爆，都肚餓了，就喺度解決晚餐。睇下menu都幾多嘢揀，泰式小食，星馬美食，價錢喺銅鑼灣都算抵食既然餐廳主打馬來喇沙同海南雞飯專門店，當然就叫左個招牌喇沙同海南雞飯套餐。【招牌喇沙】好大份，配料勁豐富，大蝦 蜆肉 蟹柳 魚蛋 豆卜 雞絲 雞蛋，細食嘅可能都食唔晒。鍾意馬來喇沙因為唔似咖喱咁辣咁熱氣，小小甜甜地，粗麵同米粉配搭口感更有嚼勁，層次更豐富。【招牌無骨海南雞飯】又係好大份。有埋油飯，菜心，餐湯。見到個醬料唔似其他餐廳有三格，不過我次次都係點紅色辣汁，所以冇姜蓉反而好啲。雞肉都新鮮，雞皮好薄好軟糯，唔肥，配埋花生同青瓜絲，爽口又開胃。【馬拉盞炒秋葵】成日食通菜，今次見到有秋葵好特別。秋葵火候差小小，硬左D，不過都爽口嘅。馬拉盞好入味，有秋葵嘅清香同蒜蓉味。甜品係【椰汁西米糕】擺盤好精緻，唔會太甜，面頭嘅椰糕都幾厚，唔錯。兩人四個送，超飽，人均$143，好抵。細食嘅可以一人一個餐已經好飽。