金蘭花泰國菜館

營業中

休息中

舊同學聚會，梗係去九龍城金蘭花啦，我哋以前係城大成班同學都已經成日嚟，唔係因為金蘭花啲嘢食平抵食，而係佢哋啲嘢食質素真係好高。好似今晚我哋叫咗炸豬手同幾年前一樣，仍然都係送兩支啤酒，好食唔再講，又真係好抵食。次次都食佢嘅咖喱蟹，今次我哋專登叫咗咖喱大頭蝦。金蘭花一向嘅咖喱都係冇得輸，好香濃、好幼滑，大頭蝦又好好肉，抵食，我哋叫咗抓餅嚟配。以前就成日食佢個烏頭爐魚，貪佢魚湯好清甜，酸酸好開胃，今次我哋專登叫咗個冬陰功明爐烏頭魚鍋嘅，個湯係微辣、酸酸地，更加惹味。好多泰菜餐館都已經冇得食糯米雞翼，佢哋嘅糯米雞翼啲糯米加入冬菇粒同埋蝦米仔，超好食。豬頸肉一向都好食好惹味，食完唔想停，跟住再嚟多個菠蘿炒飯，呢個就見到佢哋師傅嘅真功力，菠蘿炒飯炒得好乾爽，又惹味又有新鮮菠蘿粒，再加少少豬肉鬆，超級好味又大份抵食。我自己嗰杯芒果沙冰都要讚一讚，芒果味好濃，飲落去透心涼。每次黎金蘭花都好響享受佢嘅食物，真係一間好有心做泰國菜嘅泰國餐廳，好味抵食，非常值得推介！