幸腹滿屋日本料理 (已結業)

公司樓下嘅餐廳，午市經常爆滿，就同個朋友夜晚黎食啦！呢間餐廳門面係睇唔到入面嘅，好神秘。餐廳入面唔算大間，晚飯時間嘅人客都唔算多。我同朋友就揀咗一個四人卡位坐。冷喬麥麵（$78）✨我叫嘅喬麥麵係用一個裝滿咗冰嘅大盆裝住嘅，上面擺咗個竹蓆隔住，放咗啡色嘅喬麥麵同一啲紫菜喺面頭。凍嘅喬麥麵好好食，一齊上嘅仲有麵汁、蔥、鵪鶉蛋。冰凍嘅喬麥麵加上室温嘅汁唔止更易入口，仲豐富咗佢嘅味道。加埋蔥同鵪鶉蛋就更香。呢個我會比4.5/5分，如果夏天先黎食就更正啦～立魚豆腐湯（$88)✨朋友叫咗立魚豆腐湯，入面嘅材料非常豐富，絕對真材實料。除咗立魚塊之外，仲有粉絲、菜、豆腐。好鮮甜好好味。4.5/5分！海鰻長卷（$78）✨之後就係我最愛嘅一樣嘢食——海鰻長卷。顧名思義，佢就係鰻魚壽司啦。但佢唔係普通嘅鰻魚壽司，唔係普通嘅壽司飯、紫菜加鰻魚。佢係一個壽司卷，入面有蟹柳、青瓜同玉子，然後再加上面嘅鰻魚。鰻魚仲非常肥美，十分正。5/5，爆分！