滬點 (已結業)

我老豆非常鍾意食上海菜，但次次食親都係集團式經營嗰幾間上海餐廳，真係食到人都厭！好難得搵到呢間特色上海餐廳，環境特別，有霓虹燈，夠晒Trendy! 嚟到上海餐廳，一定要點招牌小籠包，如果個小籠包唔好食，咁間餐廳就真係唔掂了! 好彩，呢間餐廳完全冇令我哋失望，小籠包個皮非常薄，入邊啲肉好味道, 完全可以用皮薄餡靚多汁嚟形容！點左個辣子霸王雞丁，價錢完全一啲都唔貴，而且勁大碟，啲雞肉都幾大舊，冇骨，食得好開心，好惹味，麻辣味超重！ 我哋要小辣，不過都好辣，所以如果大家唔係太食得辣，可能要叫waiter 要少少少少辣! 另外點左個黑松露炒蝦球，黑松味好重，蝦球勁大嚿，夠鮮味，都值得推介！ 另外點了老上海炒飯，大家應該知上海炒飯比平時廣東炒飯味道比較濃味，我哋都幾鍾意食呢個炒飯！酸梅湯好飲，凍冰冰，配埋個辣子霸王雞丁一齊食好正！呢間餐廳我哋一定會返嚟🥰