翰騰閣 (已結業)

今天原本想食韓國鐵板燒，但老公又話想去又一棧飲茶，去到見到話3時就茶市完，望吓個錶成2點5個字，重點敢入去呢！去咗樓下間翰騰閣，之前個姪孫擺滿月食過，茶市就未試過嘞，咪入咗去試吓囉‧都OK，冇話個個掛著收枱收嘢唔理客人‧叫咗茶睇緊點心紙o既時候，有個姐姐走埋嚟話佢哋午市有做啲燉湯，一個人份量都夠兩個人飲，問我哋試唔試？咪試吓個豬肺湯囉，點知賣晒，就改試個木瓜燉山斑啦！之後再叫多5款點心，兩款炸物好新鮮，即叫即炸嗰種；小籠包就要趁熱食嘞！好快個皮就硬，裏面啲湯又唔多夠；柚皮鴨掌，老公嫌柚皮太稔，鴨掌算入味，唔太咸；個湯裏面有花膠、雞腳、瘦肉一齊燉，都好甜；最後就要介紹一下我今餐o既最愛「露筍帶子腸粉」，真係好正，想番都想即刻去食過，但切記唔好落咁多豉油，否則就會搶走帶子o既鮮甜(老公話帶子細粒咗)‧雖然帶子細細粒，但配合腸粉o既滑，同整條腸粉都係帶子，並冇唔足料，原來帶子配合腸粉比鮮蝦配合腸粉嚟得更絕配呢(不過一定要新鮮)！不過埋單連貼士要$300.00，一個午餐嚟講就見人見志啦！