康竜九州拉麵 (已結業)

星期六熱熱地，原本打算食壽司，但經過此店突然又想食拉麵，於是轉軚，其實之前已試過呢間店，都覺得幾好食的，最鍾意佢有得揀麵，有幼麵、粗麵同芝麻麵，仲可以揀埋味濃定味淡、油量同配菜 (可以一次要2或3份溏心蛋)。我哋兩個人叫左2碗麵同2個小食，友人揀「豚肉軟骨幼麵」，而我就揀左「吉列豬扒粗麵」，2個小食 - 「燒鯖魚」、「七味豬頸肉」。我都有試豚肉軟骨，好入味，D軟骨都好淋好容易入口，配埋D湯真是一流，至於幼麵，朋友話都幾爽口幾好啦， 但我覺得粗麵較為有口感，而吉列豬扒就比我想像中好，外層炸得鬆脆，但仍保留不少肉汁，點埋個豬扒汁 (有少許梅子酸味) 仲好味，好過配沙律醬；不過我哋最鍾意的是豬骨湯底，很鮮味同飲得出豬骨的味道，飲完都唔覺得口渴。本人一向都不好豬頸肉，所以冇吃，但朋友話幾好食，幾爽口，至於燒鯖魚外表一般，但就好香口，醬汁好開胃，即得推介。食物方面就很滿意，但店內以黑紅色為主，環境較暗，枱面較細，差點兒放不下所有食物，舒服程度一般。