味彩 (已結業)

今日嚟咗葵興一帶食Lunch，由於1點幾，周圍都好多人，最後見呢間日本野唔洗點等，就同個fd入去試下，點知真係好失望。呢間算係貴價日本餐廳，點知服務完全唔得，想點菜個陣不停招手，侍應好似睇我哋唔到咁，等咗好耐先有人嚟。之後點咗個粒切魚生飯，跟前菜、蒸蛋、沙律同味噌湯，睇落都幾豐富。蒸蛋的確唔錯，滑一滑又夠熱。粒切魚生飯賣相唔錯，只可惜份量超少，而且味道一般。先講份量，基本上上層的魚生的確算多，不過底層的飯得半碗都冇，幾啖就食完，而味道方面，三文魚唔太新鮮，有少少雪味，而吞拿魚鞋口，不過甜蝦就唔錯，雖然唔算好大隻，但夠鮮味。不過以$148的價錢有D唔抵食，加埋一成$160，又唔飽又唔算好味。最後可能唔夠人手，埋單都係搞左勁耐。