老川皇

營業中

休息中

有朋友喺佐敦呢頭返工，佢話今晚想食辣嘢，於是就上openrice睇吓有咩揀，見到呢間四川菜好似幾吸引，於是就同佢嚟試吓。餐廳唔大，但好多內地人都嚟食，成晚都人來人往，一直都爆滿，我諗應該冇揀錯啦。因為我唔太食辣嘅，所以同個朋友講明唔好嗌咁辣。佢咁岩叫咗兩個小菜都係豬嘅嘢嚟，一個係豬肚，另一個係豬肝，兩個男人竟然叫左兩碟內臟，不過兩款嗰味都唔錯，送飯一流。酸菜豬肚令我諗起，低俗喜劇話食呢個咸酸菜牛歡喜，不過原來用酸菜嚟炒豬肚都真係幾好食，酸酸咸咸，又有少少辣，真係百感交集呀。土匪豬肝原來係用咗尖椒同埋芹菜黎炒，豬肝爽口，咸咸辣辣，送飯又係一流。其實呢間野仲有好多小菜，但係兩個人真係唔食得太多。朋友話下次要再嚟食要再加多少少辣。