歷山餐廳

營業中

休息中

晚市重開，特登約班朋友出嚟試吓呢間新新地嘅酒店自助餐。雖然新開張嘅時候，好多報道blogger YouTubr都話呢個係一個伏，但係本住「讀萬卷書，不如中萬次伏」嘅心態，決定俾錢去試一試佢。首先講吓呢間酒店嘅裝修，的而且確可以話係富麗堂皇，至於風格都真係見仁見智。有啲人覺得係過咗火，土豪化，有啲就覺得非常之華麗 ，但係打卡都不失為一個好地方。言歸正傳，究竟呢個自助餐係咪真係傳說中咁伏呢？簡單來講就一半一半啦。先講菜式種類方面，都有數十款，以中式為主，西式就唔多。中式嘅菜式表現一般高過西式👍個人最喜歡嘅就係黃金蝦同埋片皮鴨。同行嘅朋友就覺得個羊架係最好。甜品方面有六款唔同嘅Häagen-Dazs，仲有啲cake 焦糖布甸同拿破崙餅，仲有炮谷添。但係冷盤就明顯失色啦….長腳蟹好似煲過湯咁，啲肉質好鞋而且好乾身。日式嘅刺身應該係來貨問題，普通去間放題餐廳嘅質素應該都好過佢🥲至於生蠔，味道普普通通啦，但係開殼可以沖乾淨啲……總結：如果你想搵間裝修好啲嘅餐廳，坐低同朋友傾吓計食吓飯，呢個可以係一個唔錯嘅選擇👍但係如果你對食物質素好有要求，又或者好鍾意食海鮮冷盤刺身嘅話，呢度你應該會非常失望。