大門橫丁串燒手打烏龍麵店 (厚福街)

營業中

休息中

眼見呢個舖經常座無虛席，晚市時段仲周時有人企門口等，根據肥仔奇多年獵食嘅經驗所知，一間要排隊嘅舖頭係不出三個可能：１．好食、２．好平、３．新開張。食過之後我會認為呢間舖之所以多人，純粹係因為２．好平。首先試試串燒雞翼，燒到過熟、乾哂、冇肉汁，調味亦不見得有何出色，失敗！再嚟試吓芝士蘑菇串，受惠於食材嘅新鮮原生菇味與多汁，再加啲芝士就好難整得難食。試埋汁燒日本年糕，好唔錯，個汁做得幾惹味，年糕夠煙韌，豪不吝嗇地包塊紫菜增添口感，呢個要讚！自家製蕃茄濃湯配以手打烏冬係毫無瑕疵，糖心蛋熟度剛好，蕃茄濃湯亦的確係蕃茄濃湯，若果一定要彈佢的話，就係個烏冬灼耐咗少少。真正出問題嘅係呢個和風燒鳥（燒雞就燒雞啦燒咩鳥啫），可能佢真係改錯名用咗個鳥字，鬆脆外皮之下係一陣好似雞屁股咁嘅禽鳥味，我唔知佢係冇用薑醃過定係點樣，總之如果唔去皮係根本食唔落。