Balaboo (已結業)

本身住喺附近，知道厚德街市裝修咗，入面多咗啲細舖，呢頭終於有個正常少少嘅地方可以掃街下喇。今日俾我發現到呢間小店除咗有咖啡、牛奶布甸之類嘅甜品之外，仲有我最鍾意嘅薑汁撞奶，仲要唔太貴，都算街坊價。咁就試咗個薑奶先，因為佢哋唔係預先燉好嘅奶，而係真係即刻攪爛啲薑，煲熱啲奶，再倒落個盎度。老細一個人又要serve客，又要煮，都算幾快手。因為我想坐喺吧檯度食，佢連埋個盤上，就咁睇完全唔似街坊貨色。個撞奶薑味好出，應該用咗老薑，但辣味唔算好嗆喉。佢用本地農場奶，都算滑溜，不過奶味唔太香濃。同埋佢係即撞，冇落到蛋白，所以奶唔係凝固得好實淨嗰款，但我幾鍾意，質素唔比義X牛奶公司遜色。