山地人越南法包專門店 (已結業)

有日同朋友講開響越南食野，朋友話呢度有間好好食的越式法包，上openrice見間舖連個名都寫越式法包，好似好專業，weekday夜晚就黎左食。去到發現冇人。舖頭真係幾細，大概得十個位。見menu有好多越南小食，但第一次黎梗係要試即叫即焗的法包。法包有三款揀：原味，竹炭味，同黑麥牙味。料就有牛豬雞肉鬆沙甸魚揀。淨係個sandwich都＄46，都唔平。加＄3有埋野飲。揀左竹炭味配豬肉。等包時睇牆上剪報，原來老細係澳洲留學生，返黎太掛住嗰邊的越式法包就決定自己開間。真有heart。個包用竹做的長型兜裝住幾特別。包十分好食，夠熱，面脆得黎唔會𠝹口，包裏夠軟，有淡淡的竹炭香，好正。豬肉香得黎唔油。好多菜，有紅蘿蔔絲，芫茜，青瓜片，洋蔥, 酸菜。味酸酸地同d豬肉好夾。服務係冇的。整包的好似係老細，佢似乎唔係好高興。唔係態度差，只係feel到佢唔係好想做咁。總結：Sandwich黎講佢真係唔平，但個法包真係好好食。雖然應該唔會經過炮台山呢個咁奇怪的地方，但佢都算近地鐵站，可以專登會返黎的。