阿元菜市場 (科士街) (已結業)

台式火鍋一向都好正聽朋友介紹堅尼地城開左間阿元菜市場，我同男朋友就急不及待地黎打個靚靚火鍋啦～呢到裝修簡約又舒適，坐得好舒服，好有台灣的感覺。個set好吸引，每人一個鍋，可選擇自己鐘意的湯底，包埋一款副食同埋肉類。我揀左十全藥膳湯配白飯，男朋友就揀左鮮味墨魚湯配烏冬肉類方面揀左特質安格斯牛肉和西班牙黑豚豬肉。藥膳湯好足料，感覺幾健康，好啱女仔飲。鮮味墨魚湯就真係成個湯都係黑色，不過非常鮮，幾特別。西班牙黑豚豬肉特質安格斯牛肉兩款肉類都十分驚喜，新鮮到呢仲勁大份。入口嫩滑，配合我地各自既湯底，真係好好味！另外，個set更包左一個自助蔬菜吧，裡面有好多唔同種類嘅新鮮蔬菜，除左成日食到嘅金菇、冬菇、娃娃菜、蘿蔔等，有台灣好出名嘅A菜，最吸引係好多好少食嘅菜，例如紅莧菜、紅鳳菜、番薯苗等等。每一個菜名牌更有寫食療藥效，相當貼心。我地另外叫多左一個台灣鯛魚片，魚肉好厚切而且好新鮮，入口好滑好鮮甜。火鍋又點少得叫番杯冰飲，我地叫左一杯珍珠奶茶同一杯冬瓜茶，今次火鍋晚餐，認真寫意！