龍驤 (已結業)

朋友見到龍驤係Openrice訂座嘅話，午市套餐會有七五折，咁抵食緊係要試吓啦。店員安排我哋坐喺吧枱，有特色之餘座位都好闊落。見到每份午市套餐都有前菜沙律、麵豉湯同埋茶碗蒸，因為想食熱嘢，於是嗌咗北海道鱈場蟹肉稻庭烏冬定食，仲有配兩件日本腐皮壽司。沙律菜配麻醬開胃得嚟好新鮮。茶碗蒸入面有冬菇同魚餅，有好香蛋味。麵豉湯都幾大碗，入面都幾多材料，飲落唔會太鹹。主菜烏冬賣相好澎湃，超級大碗。蟹肉嘅份量好多，食落好鮮甜。稻庭烏冬嘅軟硬度啱啱好。湯汁係比較稠果種，有好多蛋花喺入面，可以掛喺烏冬上面。腐皮壽司嘅賣相都好靚，腐皮同入面嘅壽司飯都甜甜地，同個烏冬好夾。見到隔離枱食壽喜燒鍋都好似大份又抵食，下次一於試吓啦。