吉利日本美食 (已結業)

為慶祝外母生日及外父父親節，諗住食日本野，所以訂咗四位喺吉利，聽聞食材新鮮。因為訂咗枱，一入去就有位，但聞到好魚腥味，跟著店員拿一塊手寫嘅餐牌介紹當天最新鮮食材，不斷游說我地今日父親節，叫半隻蟹食，好抵，＄16xx，嘩，好貴，我地梗係無叫啦。跟住我地自己望吓餐牌睇吓食乜，一件刺身或壽司＄70一件起步，仲要六件起跳，叫咗四件鰻魚壽司，兩件玉子壽司，兩件魚子壽司，一串唔記得邊到黎嘅豚肉串燒，＄78串，叫咗2串，雞軟骨＄38串，叫咗2串，半個汁煮魚頭，唔知乜乜煮蠔，龍蝦頭湯飯。鰻魚壽司：平平無奇玉子壽司：尚可魚子壽司：正常豚肉串燒：淡到爆，無黎味道雞軟骨：淡味汁煮魚頭：咸，鞋肉煮蠔：鮮甜龍蝦頭湯飯：好難唔好味登登登凳，埋單誠惠＄1400。根本無食過野，之後走咗再去第二度食過。總結：實在太貴，唔係唔捨得花錢食，但絕對唔係水魚任你劏，咁嘅價錢，我飛去日本食都得！