御品·千之味 (深水埗) (已結業)

收工去咗千之味外賣壽司返屋企食。聽聞呢間啲壽司都唔錯。成日食連鎖店，今日想試吓呢間壽司店（不過呢間原來都好多分店）。今日食咗火炙壽司餐同埋燒牛肉定食。火炙壽司餐唔係講笑，呢間壽司店用料一啲都唔弱。首先，火炙左口魚邊真係入口即溶，陣陣餘香。火炙三文魚腩都係好肥美。北寄貝爽口鮮甜，八爪魚大大塊，好新鮮。另外，火炙得非常好，拎到返屋企仲有餘溫，感覺好新鮮。燒牛肉定食定食有蟹子沙律，冷盤螺肉。牛肉好淋身，鮮牛肉香味，燒汁香甜，送飯一流。珍珠飯大大碗，食完真係好飽好滿足。