品茶弄啡 (已結業)

香港的天氣忽冷忽熱，有時出街真係幾頭痕，好似昨日明明又凍又雨，今日就又熱又濕，行多兩步都會口苦舌乾，好彩依家周街都是茶飲店，是日約咗朋友在尖沙咀，途經漢口道，就發現咗間唔錯的茶館。雖然不是連鎖店又舖仔細細，但選擇卻有不少，所供應的飲品包括有願望茶系列、咖啡系列、調配茶系列、拿鐵系列、奶茶系列和冷泡茶系列，還有一個咖啡專區，有虹吸、手沖和風味咖啡……門口仲有個大牌每日更新最受歡迎最賣得的飲品排行榜，最啱有選擇困難症的人。我叫咗杯取材自台灣芋頭的台灣蜜芋頭鮮奶，貪佢夠白滑，淡淡的香芋甜味不會喧賓奪主，鮮奶味仍然貫穿味蕾，不慍不火。朋友就怕胖，點了黑枸杞洋甘菊水果茶。朋友話果茶飲得多，粉紫色的賣相特別矜貴吸睛。冰涼透心的果茶味道酸滋滋，帶微甜和洋甘菊的甘香，開胃解膩。大大杯的果茶內滲滿清甜的蘆薈粒，有興趣的仲可以食埋裡面的西柚、檸檬、香橙、火龍果、蘋果和菠蘿，份量足不欺場。