意粉屋 (已結業)

星期五沙田市中心，間間嘢都大排長龍，意粉屋等10個number鬆啲，叫做合理。加上餐牌個千層麵好吸引，就決定拎飛等位。等咗大約4個字到半個鐘咁上下，門口哥仔就帶我地入去坐，放低餐牌時同我地講: 燒豬仔骨，秘製醬汁，肉質鮮嫩。咁我同男朋友仲覺得佢好慘，要將啲廣告對白兜口兜面讀俾啲客聽，可謂揾食艱難。由於我地喺充裕嘅等位時間已經諗好食乜，坐低好快就落單，叫咗一客龍蝦湯，一個小食拼盤，同一個千層麵。好快龍蝦湯上嚟，個湯好鹹，無鮮味，係龍蝦味 味精湯，但係索價50，好彩無衝動嗌兩碗，唔係飲嗮佢檯面樽水都唔掂。然後上千層麵先，講句公道說話，千層麵味道正常，仲略嫌大份。最後Final Boss小食拼盤落場，我地望住上面嘅粗炸薯條🍟，洋蔥圈，三文魚，片片肉腸，雞翼，同春卷，就好似小朋友去迪士尼，花多眼亂，滿心歡喜。先伸手拎薯條，一放入口，就諗起老麥，但又有啲唔同，老麥嗰啲係淋嘅，而我口入面嗰條，係又凍又淋嘅。然後我地緊張拎起洋蔥圈一探究竟，咁好在，洋蔥圈係脆嘅。三文魚一役亦順利度過。輪到肉腸啦，薄薄一片煎到微微捲起，睇見垂涎欲滴，但係就好似囡咁，睇同食係兩回事。同龍蝦湯一系列嘅肉腸，同樣係腎虧之作，