影片
更多
2016-12-10
2124 瀏覽
近排收到啲郵政宣傳，喺新店開張嘅單張連優惠券，食滿$200減$50，食滿$400減$100，變相75折，新店位置就晌中環萬宜大廈以前玩具反斗城個鋪位，對於我依等返中環工嘅人就極之方便。今晚同幾位朋友到此，見識一下佢哋嘅真功夫，睇睇喺咪咁打得。走進店內，裝修型格得嚟，帶有好多香港傳統特色元素，淨喺門口上方嘅牌匾就一派黃飛鴻時代嘅武館格，點解咁講，因為入到去真喺好多嘢都同舊式嘅武館扯上關係，如木人樁、長槍、關刀、獅頭……等等，店員仲話啲關刀等武器全部都喺真嘢，只喺未開封，歡迎拎嚟拍照，小弟拎上手果然好重身，一對雙節棍門柄，已夠晒心思啦。此外，一入門口嘅金龍，好有懷舊味道，紋理細緻，活靈活現，搶眼非常，相信依家搵整依類金龍嘅手藝師傅都所餘無幾。餐廳地方其實頗大，趁未上菜晌裡面遊走一轉，發現仲有好多玩味嘅擺設。內裡格局主打喺4人枱，亦有啲大張方形嘅8人枱，都喺坊間少見，另外，餐廳尾更有兩間開放式嘅貴賓房，每房可容納10人，兩房亦可打通。而一家餐廳嘅心臟「廚房」，更用上開放式，喺唔怕客人「監察」師傅做菜嘅自信心。所以，八卦吓望一望，睇到巨型烤爐、烘乾機、師傅即場拉麵條、做點心……等等。除咗武館元
走進店內，裝修型格得嚟，帶有好多香港傳統特色元素，淨喺門口上方嘅牌匾就一派黃飛鴻時代嘅武館格，點解咁講，因為入到去真喺好多嘢都同舊式嘅武館扯上關係，如木人樁、長槍、關刀、獅頭……等等，店員仲話啲關刀等武器全部都喺真嘢，只喺未開封，歡迎拎嚟拍照，小弟拎上手果然好重身，一對雙節棍門柄，已夠晒心思啦。
此外，一入門口嘅金龍，好有懷舊味道，紋理細緻，活靈活現，搶眼非常，相信依家搵整依類金龍嘅手藝師傅都所餘無幾。
餐廳地方其實頗大，趁未上菜晌裡面遊走一轉，發現仲有好多玩味嘅擺設。內裡格局主打喺4人枱，亦有啲大張方形嘅8人枱，都喺坊間少見，另外，餐廳尾更有兩間開放式嘅貴賓房，每房可容納10人，兩房亦可打通。
而一家餐廳嘅心臟「廚房」，更用上開放式，喺唔怕客人「監察」師傅做菜嘅自信心。所以，八卦吓望一望，睇到巨型烤爐、烘乾機、師傅即場拉麵條、做點心……等等。
除咗武館元素，原來仲有涼茶館及醫館元素，因為近門口嘅酒吧位，有一座大嘅涼茶銅葫蘆，下面有個牌以拼音寫住「鬼佬涼茶」，後尾再睇餐牌時見到有手工啤賣，就知到佢葫蘆內賣咩葯。此外，其他位置都仲有好幾個「大葫蘆」，不過，店員話嗰啲就只喺裝熱水添茶用。
講開茗茶，依度始終喺中式營運，收茶錢喺自然嘅事，不過，依度收茶錢比平常樓家貴，熱茶$19位，凍茶$29位，除地區關係外，茶品嘅選擇確喺有其賣點：希臘洋甘菊、龍井薰衣草、荔枝大紅袍、紅棗玫瑰花，喺咪好特呢！點凍飲，更喺原樽送上，小水杯仲加咗冰粒同青檸檬及下幾瓣玫瑰花，好有格調。
主餐牌圖文並茂，中英對照，不過早晚有別，晚上無咁多點心供應，會有較多大菜選擇，然而，見佢哋啲點心賣相非常精緻。
不過，主餐牌喺無標示價錢，價錢印晒晌點菜紙度，所以，為方便大家有個參考，就索性掃描佢哋啲點菜紙俾大家，列晒價錢，大家嚟食飯就可以有個預算。
藍莓冬瓜 $69前菜共有14款選擇，單睇名稱及食材配搭，頗有特色，而依一款做成串葡萄外型嘅藍莓冬瓜，賣相已經好吸晴，最估唔到冬瓜粒口感做到爽爽哋，而藍莓醬調校得酸香細緻，喺一道超醒胃嘅前菜。原來，前菜有買二送一嘅優惠，走寶添！
龍蝦蘿蔔酥 $69（兩件起）晚市嘅點心就剩低5款以龍蝦入饌嘅款式供選擇，相信依幾款都喺店家嘅招牌嘢，睇人哋嘅食評，就以依道蘿蔔酥賣相最具睇頭，原隻龍蝦樣呈現番出嚟。如果細心留意嘅話，蘿蔔酥嘅酥皮喺兩隻色間住，做得像真細膩。
好睇唔好食又喺無用，不過，入口外層好鬆化，而餡料除蘿蔔絲，加入馬蹄粒，又有唔少龍蝦肉，清甜嘅蘿蔔，配上爽彈嘅蝦肉，喺超高檔嘅蘿蔔絲酥餅。價錢就肯定比晌酒樓食普通嘅蘿蔔絲酥餅貴好多，但品嚐嘅唔止喺味道，仲有喺欣賞嘅喺師傅嘅心思同手工。
龍肉湯麵 $149翻餐牌時，已見晚市點心以龍蝦為主打，再睇有一系列「龍湯拉麵」，又成為菜式中嘅亮點，當然，佢哋又會咁單一，仲有多款拉麵、撈麵、烏冬、蒸飯……等等。
豪一豪食番碗龍蝦湯麵，即拉麵條喺唔同啲，柔韌而富彈性，雖然影相搞耐咗，但都無話浸腍晒；個龍蝦湯底好香濃，濃郁得無得輸，而蝦肉爽彈，豪一次半次都值。
講開佢哋嘅龍蝦菜式，就順帶一提晌之前「參觀」餐廳四周嘅時候，近廚房尾，冰鎮住多款海鮮，一排排龍蝦更唔少得，師傅神氣咁講，喺本地青龍嚟架，即喺唔喺普通嘢啦，收到。
京城：即燒片皮鴨 $499晌晚餐點菜紙上，有一張特別列出幾款菜式，包括：金鍋芝麻吊燒雞、牛高碼大骨、荷葉八寶富貴雞、鐵鍋半肥瘦叉燒及京城即燒片皮鴨，咁重點額外擺出嚟，相信喺招牌推介。
即燒片皮鴨當然晌你面前起皮、起肉先夠派頭，但原來，真喺好似張單張咁，分為3碟：淨皮、皮連肉及淨肉，而師傅手勢非常純熟，三幾吓已經將鴨皮、鴨肉起晒，並附上蒜頭蓉、紅蔗糖、甜鴨醬+芝麻醬及青瓜條、蜜瓜條、京蔥條、紅菜條。店員有建議食法，稍後再講，如要兩食，即鴨殼起肉煮為其他菜式，喺比出面酒樓款式多，更意外嘅喺唔只兩食，因為佢哋每日賣出嘅片皮鴨都唔少，變相鴨肉有唔少存貨，三食、四食都得，只不過喺逐道菜式計而已。
淨皮真喺得層皮，近乎無皮下脂肪，可見師傅刀功，而建議食法就喺蘸紅蔗糖。淨食都仲喺有微微油膩感，但沾咗啲蔗糖，效果真喺唔錯，再者，趁仲熱辣辣，啲皮好甘脆。
淨肉睇師傅切嘅時候，真喺留意到佢喺有部署，而且，切得每片鴨肉大細、厚薄均一。建議食法就喺蘸蒜頭蓉，由於用生蒜做，帶點辛，所以，小弟覺得唔好沾太多，輕輕一小抹就搞掂，入口肉質細嫩，好有鴨肉香，蒜蓉正正辟咗啲鴨燥味。
皮連肉依個就如傳統食片皮鴨嘅食法，即喺按喜好，加上青瓜條、蜜瓜條、京蔥條或紅菜條，再添入甜鴨醬、芝麻醬以薄餅皮包住食。啲薄餅皮塊塊有牛油紙隔住，所以唔會黐實晒，將所有配菜放埋一齊，集多重口感，非常滋味。
桂花炒假翅 $119無食魚翅好耐，依道素翅就可以止吓癮。但無想過，簡單一道桂花炒翅都以堂弄形式登場，真材實料（素翅、蟹肉、鹹蛋黃、豬肉、蛋黃、銀芽、蔥花）擺在眼前，大師兄（男店員嘅稱呼，而女店員襟前就寫住小師妹，小弟就唯有自稱牙擦蘇）一邊炒，一邊講解，落料先後有序，加上手藝純熟，炒得材料十分均勻，蛋粒細碎如桂花，更加入鹹蛋黃，令道菜更惹味。唯一挑剔喺鹹蛋黃份量有啲偏多，所以，整體味道有輕微過鹹，所以，加個「靚仔」嚟撈飯食就一流。
有啲人天生好打得，小弟就自絕無依方面嘅基因，迤吓迤吓就算，是晚嚟到「龍麵館」（Dragon Noodles Academy – DNA），一道龍蝦蘿蔔酥已睇得出師傅手藝，而兩道堂弄菜式，就更加顯出其功架。以中環區而言，定價合理，況且菜式頗有心思，將傳統揉合新派，賣相好精巧，環境、服務亦都好稱心，喺間幾特別嘅新派中菜館。
張貼
