囍慶酒家

營業中

休息中

今日同男友父母食飯，叫咗兩個海鮮餐$438x2，都幾抵食，而且比預期好食，所以都推介下。但大家要留意，4位去食更抵。因為會多一個湯同埋蟹煲。上湯開邊龍蝦伊麵 - 我鍾意龍蝦開邊食，因為好易起肉，仲要係一條過，啖啖肉。龍蝦鮮味彈牙，伊麵吸收晒上湯同埋龍蝦精華。礦泉水鮑魚 - 清清地嘅鮑魚味，沾小小wasabi同鼓油，更能帶出鮮甜。白灼蝦 - 白灼蝦最緊要係新鮮，食落就知。清蒸龍躉 - 因為我地4個人，叫套餐可升級食龍躉，抵食。豉椒炒花蛤 - 份量唔少。紅燒開邊乳鴿 - 正常的酒樓水準。金銀蛋菜苗 - 第一次食唔係莧菜配金銀蛋，又ok wor。勁蒜貴妃蚌 - 除咗用新鮮蒜同埋粉絲加係面蒸，蒸完仲有炸蒜加係面，名符其實。蒜、粉絲、蚌，三樣一齊食，絕配! 我地秒殺咗呢幾隻蚌。金粟海鮮湯 - 加咗粟米嘅海鮮湯好清甜，仲有蘿蔔、蝦、蜆…。xo醬粉絲蟹煲 - 呢個蟹新鮮、粉絲入味，好食到唔停口，最推介。炒飯 - 都唔錯，但由於太飽，所以食唔晒。個餐包野飲，我地要咗椰青水，仲有紅豆沙/綠豆沙送，食到捧住個肚走。臨走睇到酒樓仲有龍蝦海鮮火鍋任飲任食嘅餐，下次可以再嚟試下。