許留山 (已結業)

飲食業競爭大，搞新花臣，搞多樣化， 玩宣傳係必然嘅事，但都唔可以係求求其其要做乜就做乜，有時都真係要喺嘢食嘅味道上花啲功夫同心機。講咁多嘢，發噏風，係因為我經過許留山食咗一啲好頹嘅嘢食，我覺得係完全冇heart嘅出品。就係呢個--印尼巴東咖哩牛肉飯 $42首先我曾經都係廚師，雖然我冇乜名堂，但係我都知 巴東汁就係巴東汁，咖哩汁就係咖哩汁，兩種汁底嘅做法同味道都係唔同嘅，但家陣呢壇嘢就叫做 巴東咖哩，真係唔知呢啲係乜嘢玩法。就當你玩創意搞fusion，個味道都要掂先至得，但呢個巴東咖哩只係得個辣字，一啲香味都冇，而且質地水汪汪，然後求其淋上個椰漿就算，牛腩唔夠淋又唔夠入味。好幸運， 呢個餐附上嘅甜品，係好食嘅。許留山始終係做甜品為主，搞乜嘢印尼巴東咖哩，堅係唔好食，真係好搞唔搞。