丼丼亭 (已結業)

日本有唔少連鎖天丼專門店，原來香港都有! 呢間丼丼亭店內裝修簡約整潔，地方闊絡，俾人舒服嘅感覺。呢間雖然係天丼專門店但仍有唔少其他種類嘅丼飯甚至壽司刺身可以選擇。睇完menu都係對天丼最有興趣，就叫左一個天丼一個雜錦天丼。天丼: 上枱時見到啲天婦羅咁彭湃已經加左好多分。呢個天丼有兩隻海老天婦羅，3種野菜天婦羅，分別係茄子，南瓜同青椒各一件。啲野菜天婦羅件件都幾大塊，特別係茄子。炸左嘅野菜們都保持水份，唔會乾，可惜南瓜唔夠甜。炸衣有少少厚，同埋比較油，但都算鬆脆。海老天婦羅嘅海老好幼，唔係好食到蝦味，而且都係太油。本來以為飯太少，但其實都夠食。另外個天婦羅醬汁太淡，但枱上都有7味粉同海鹽俾客人自行使用。雜錦天丼: 同天丼嘅分別在於呢個丼少隻海老，變左魚天婦羅同雞柳天婦羅各一。魚天婦羅係唔錯嘅，魚肉好滑，同脆脆嘅炸衣好有對比，但依然係被太油呢件事破壞左整體。雞柳天婦羅應該係用雞胸部位，炸得啱啱好熟，都仲有啲肉汁。但用雞柳做天婦羅好似唔太夾。題外話: 跟飯嘅漬蘿蔔又幾爽幾好味喎，可以用黎中和油膩感。