燈籠滷味 T.P.E. (M88) (已結業)

係中環想食台灣野,選擇真係唔多。今日lunch嚟到呢間食店,勝在人唔多,唔使點排隊。門口啲霓虹燈仲好吸引我打卡添,嘢食又好冇呢?入到餐廳,坐低見到啲裝修好特色,有卡位又有吧檯,枱與枱之間又唔算迫,坐得都好舒服。自己掃code落單,夠晒先進。我哋嗌咗午市套餐,包括眷村懷舊排骨滷肉便當、阿嬤古法鹵雞翅膀滷肉便當,仲有單叫左阿嬤古法滷雞腿滷肉便當。其中頭兩個餐係包埋台式飲品,一個set有三碟小食、一碟餸加一碗飯,八十幾蚊個餐,仲包飲品,係中環黎講,認真係抵食。補充一下,雞腿便當隻雞脾雖然冇圖片咁大,但係一樣豐富好食。再補充一下,每個餐啲餸底下都有好多菜、粉絲同埋粟米,淨係食d餸都已經飽晒,所以男士會覺得好滿足,女仔就可能覺得太飽喇! 順便講埋個滷肉飯,都好香口唔肥膩,唔錯!我哋仲叫咗個小食~海苔鹽酥雞,有個shake shake紙袋畀我哋, shake完至食,好玩又好食…哈哈。餐廳仲不停播啲台灣流行曲,營造台灣feel,心情都輕鬆啲!我對呢間餐廳整體感覺非常好,下次會再黎幫襯。