來佬餐館 (已結業)

上次係灣仔返工，朋友介紹我食呢間lunch，話環境好價錢又唔貴，試過一次真係唔錯，就試吓佢個晚餐。先叫左個茉莉茶香煙燻白鴿胸沙律，感覺白鴿胸比鴨胸更滑，更有肉味，而沙律就好清新。焗原隻帶子伴薯蓉，想講個擺盤超靚，喺沙灘嘅感覺，好好打卡，而且味道都相當唔錯，估唔到個帶子咁大隻！意式泡沫黑松露野菌湯配炸豆腐串，呢個湯係我覺得全晚之中最好味嘅一道菜之一，首先真係好似杯野飲，熱度好夠，入邊有粒粒蘑菇同黑松露，好香好濃郁，我將啲炸豆腐放入個湯度食，成件事又昇華左。主菜方面，叫左燒西班牙橡果黑毛豬配蘋果蓉，唔知點解我覺得好似牛，一樣好濃肉味，唔似雪藏肉，好厚身，唔會un,而且配埋蘋果蓉食，酸酸地好開胃，又解左油膩感。跟住叫左個酥皮蜜糖鵝肝煙鴨胸批，成個外表好似威靈頓牛扒，相信係用咗好多手工做成，切開完全唔會散，鵝肝亦比得相當大方，多重口感，覺得好好食！配埋雜莓醬令到無咁乾身，配搭得幾好！女仔有個甜品胃是真的，一口氣叫左兩個甜品，Tiramisu 味道不過不失，好濃酒味，值得一提係好似盆栽，幾可亂真，打卡打卡！心太軟配雪糕呢個配搭根本就冇得輸，而且個流心相當完美，令到我呢餐都相當完美咁結束。