小印度餐廳

營業中

休息中

晚飯想試啲新口味，路過呢間小店，見裝修簡約整齊，感覺舒服，於是決定光顧。我一行兩人，散叫好難試多幾款菜色，見二人餐配搭唔錯，就叫咗一個。上餐前先送上印度脆餅，配薄荷醬，幾香口。跟住上豆蓉咖喱角同板燒烤雞。前者酥軟，一啲都唔辣；後者出奇地嫩滑，比我之前食過嘅印度烤雞好味。咖哩牛味度稍淡，怕辣嘅會好鍾意，我就覺得唔夠濃。燜黃扁豆質感豐富，味道同樣偏淡，配搭蒜蓉烤餅，剛好。黃薑飯好大碟，飯粒特別長，唔知係咪用咗印度米。味道方面冇乜特別，我當佢白飯咁食，不過飯身比較硬，要加咖喱汁至啱口感。甜品比較特別，係一款叫「拉斯瑪萊」嘅甜奶球。第一口嘅感覺似食椰絲球，但奶球比較易化，質感比較軟，稍甜，但有奶香，都幾好味。隨餐有飲品，我㨂咗芒果乳酪，好香滑，大大杯，好夠分量。整體來講，呢家小店嘅出品好有誠意，製作認真，分量好足，性價比高之餘，味道亦唔錯，值得推介！