港星餐廳 (已結業)

由於之前食過覺得他們嘅小菜同小炒出品都幾好，所以我們今晚去咗旺角道嘅「港星餐廳」買外賣自取返屋企食！我們買咗豉汁黃立䱽嘅肉質好鮮味嫩滑，至於豆豉方面更早前亦講過他們係特意將豆豉炒過，令到豆豉嘅香味更加提升，而且味道唔會好鹹！西芹腰果炒蝦球嘅西芹好清甜爽脆，蝦球好爽甜彈牙，腰果亦好香脆，唔會過咗火而變到好腍身！黑椒牛柳絲炒烏冬嘅牛柳絲好鬆軟嫩滑，而且份量都幾多，烏冬麵質好煙煙韌韌，黑椒汁非常香辣惹味，而且相當均勻咁沾滿每條烏冬！香辣炒米炒得好夠鑊氣，材料亦好豐富，平日通常都係食星洲炒米，係用咖哩粉炒，但今次食呢個香辣炒米係用鮮辣椒炒，所以味道更加鮮味，真係好正呀！