陳記魚蛋

營業中

休息中

今日同老公陪屋企人食完飯就諗住到路德圍食個糖水，食完突然口痕痕，好想食下小食，但行左好耐都諗唔到食咩好，本身打算去食豪大大雞扒，但見到有勁多人排隊.....所以就打消左呢個念頭。之後見到豪大大隔離有間唔多顯眼嘅舖頭仔，傳黎陣陣嘅香味，立即走上前睇下係咩黎。見到係一間賣魚蛋嘅舖頭，仲有三種辣汁比大家揀，舖頭嘅牆上痴滿周刊報導，蘇絲黃都話辣汁好味咁，真係估唔到咁隱世嘅店舖原來係咁出名。見到有香腸就叫左一串，要小小辣嘅辣汁，未食入口已經聞到好香嘅辣味，係聞得出佢係由好多香料煮成。雖然只係小小辣，但對我黎講辣味已經好夠，仲有少少嘅甜味，個種香味係有別於出面嘅辣汁，出面嘅汁係得個麻味，完全冇辣嘅香味，呢度嘅辣汁直頭令人一試難忘，只可惜我已經食得好飽如果唔係我一定食多幾串。下次黎到路德圍呢度一定係我不二之選。