漢城美食

營業中

休息中

FD話佢返工附近，有間好正嘅韓國餐廳，全部係由韓國人打理，可以食到正宗嘅韓國嘢食，一定要試試啦。餐廳裝修幾韓風同埋整潔，晚市都可以安排4人table，坐得幾闊落。Menu好豐富，可以食炸雞，部隊鍋等，好難揀。一坐低，即刻送上3小碟韓式前菜，其中泡菜最好味，食落酸辣惹味，唔錯。生米酒，食開韓國嘢，一定要搭配韓國傳統米酒啦。韓國米酒，入口少少甘甜，酒味唔算好重，就算女仔飲都OK。韓式豬手（半份），半份都已經足夠兩人食。豬手斬成細件，皮好軟糯Q彈，肉入口即化一D都唔柴。豬手已經醃制過，唔洗點醬已經好夠味。豬手仲搭配埋兩份醬汁，一個係韓國辣醬，一個係好特別嘅蝦醬。如果包埋生菜一齊食，建議搭配特色韓國辣醬，食落好惹味。辣牛肉京蔥湯，送上來仲熱笠笠。配料好豐富，有粉絲，牛肉，菌菇同京蔥絲等。湯入口大醬味濃郁，伴隨少少辣味，成份飲曬身體都暖咗。如果係冬天，一定勁推薦飲哩啲燉湯。