永記潮州粉麵

營業中

休息中

永記係我响上環工作獨個兒午餐既熱點，唔好飯既我，隔三、兩天就去一趟，大熱天時10分鐘行程，背脊都可以濕透。今日無食中午飯，3點多黎到永記，期待食到美味既湯粉。無想像到呢個時候店裡都坐滿咁多客人。立刻叫至愛既黑百葉拼魚餃米，再配清湯菜，點知黑百葉同菜都已經沽清，有點失望！唯有退而求次，第二最愛豬潤代替栢葉啦。可能就係喜歡永記新鮮既材料，所以今次食唔到自己既至愛，下次都係早d去！無問過永記既歷史，但相信無30年都有20年，因為經常都有相熟朋友到店內同潮州老闆頃計，相信大家都係老街坊。而永記亦都係家庭式經營，自我幫襯當年，潮州老闆仲响厨房當厨，但其後可能年紀大喇，只當收銀，厨房就由仔女輪流擔任，以於媽媽一般都當樓面。永記所處地區、環境、經營手法絶對富有老香港既特色。 豬潤魚餃米：湯唔係一般清湯，味道鮮甜，再加上大量既唐芹，香味四溢，一試便知龍與鳯。豬潤切得細細塊，酌得剛熟兼嫩滑，平時怕食又硬又嚡既豬潤，但永記就食得好安心！用魚露加辣椒油點豬什，會更加正！永記唯一要改善既地方，相信係店內既冷氣系統，夏天會食到香汗淋漓。