千之壽 (已結業)

成日聽人講呢間野d魚生抵食夾大件，今晚順路去見識下。因為未夠六點就去到，唔駛等位，不過如果遲15分鐘都要等，真好彩!兩個人叫左什錦刺身($138)牛油金菇($3x)牛仔骨飯($44)同埋軟殼蟹手卷($23)。一上個刺身就知"奶"野，因為真係大到無輪，一定唔止餐牌上寫的十八件。有海膽、帶子、劍魚腩、三文魚、吞拿魚、北寄貝同油甘魚(而家諗起都有d想嘔....)件件等如人地兩件咁滯!!!!!我都係第一次食刺身會食剩，真係哽唔落，唔係飽咁簡單，係有d"意膩"!個軟殼蟹手卷又係大到嘔，成隻蟹"突"晒出黎，女仔食一個都飽。不過d飯仲係熱，有d怪。至於個金菇，我估落左四、五包去炒，食極都食唔完。牛仔骨飯亦都有成七、八塊牛仔骨。我男友邊食邊話個老細一定係中左六合彩!當見埋隔離位的沙律、甜蛋壽司、仲有成廿幾隻一碟的蝦刺身($55only,好似去釣魚咁)，就真係睇到我地眼"突突"!抵就係極抵食，多d人去會好好多，起碼可以食多幾樣野。不過就坐得唔係幾舒服，勁搭，好迫下。會唔會再去呢?呢一刻真係唔識諗，可能三文魚上左腦....