相撲手日式放題 (已結業)

今日一到放工時間就即刻拎袋走人，事關約咗朋友食放題。今日嘅餐廳叫"相撲手"，第一次嚟唔知質素如何呢？一去到店員就安排咗我哋坐窗口位，位置好闊落，唔會叫多少少就擺唔落。食物選擇有好多。打頭陣當然係點刺身先啦。第一回點咗馬刀貝、帶子、榮螺、呑拿魚、三文魚等等，嚟到嘅時候嘅數目有俾足㗎，而且魚類嘅係厚切。我個人好喜歡食馬刀貝，依度嘅切得幾大塊，好爽口而且鮮甜。帶子亦都唔錯。每次放題我都會叫枝豆食，不過有啲餐廳會烚到淋哂，又或者俾得太多鹽去整，依度嘅枝豆烚到啱啱好，最後我差唔多成碗食哂。牛油清酒煮蜆係我叫嘅，原先諗住只係俾一碗仔幾粒，點先上菜時見到係一鍋好多粒。味道上算ok啦，如果少啲牛油味，多啲清酒味會更好。串燒類我好推介俾大家，尤其係菠蘿同豬肉。菠蘿好甜好多汁，要讚佢唔係罐頭菠蘿，有菠蘿皮一齊燒㗎。串燒豬肉燒完都仲有唔少肉汁。臨尾我地兩個都戰鬥力下降，叫親都係一件起兩件止。我最後叫多舊芒果軟殼蟹卷，啲芒果好甜，同軟殼蟹非常夾。點解隔離枱都係兩個女仔，可以食足兩個鐘，而每次都叫勁多又食得哂？店家好有心有燉湯同燉蛋送，兩個都好好味呀！