港原味 (已結業)

上朋友屋企飯聚，當然叫外賣唔使煮，朋友問有咩特別外賣，諗起有次行過山林道見到依個紙包魚/紙包雞外賣，所以就想試吓呢個☺️之前打電話落去問，佢問我大概幾點到，咁佢就預時間，等我一去到，佢就啱啱煮好就最好味又熱辣辣。掙扎咗好耐食魚定食雞，大家最後決定食 🐓 紙包雞$328店主準時包好外賣，一大包，內有2個酒精爐，好似出邊打邊爐嗰啲咁，仲附有一個小鐵架，包裝認真夠貼心。去到朋友屋企，拆開包裝紙盒，裏面仲有密封錫紙兜，打開個兜仲有牛油紙包住紙包雞👍絕對保證原汁原味。今次我揀左小辣，啱啱好啱晒唔識得太辣嘅仲附送有洋蔥、芫茜、香椒子同麻辣木耳，正😄老闆話佢哋係用走地雞嘅，外賣紙包雞係全隻雞，唔怪得啲肉咁嫩滑又唔肥，加埋佢嗰個調味非常之入味，又惹味，最後我哋自己仲用埋啲湯汁。擺啲公仔麵落去打邊爐添個湯底真係好好味。下次可以再訂🤤🤤**初初驚唔夠食，另外仲嗌左個炒米粉，佢個米粉炒得好夠鑊氣，好好食，我自己仲撈埋啲木耳食，好好味。