嚐喜大不同特色餐廳小廚

營業中

休息中

店如其名，嚐喜大不同特色小廚，菜式都幾特別嘅港式中菜，北角同天后都各有一間分店，地鐵站都係行幾分鐘就到。近排受好多因素影響，入到鋪都易搵位，坐低落完單之後，好快好快就上到菜。先嚟招牌菜，冰鎮咕嚕肉，佢個盆好似特製咁，咁啲冰溶咗嘅水係唔會浸住啲咕嚕肉，令咕嚕肉變淋，保持外皮嘅脆脆。咬落口，外脆內軟，外冷內熱，好值得一試！呢度嘅煲仔飯係強調用碳火煮嘅，白鱔嘅表面被火輕輕烤過，精華都跌入啲飯裏面，飯焦啱啱好，只能夠話師傅嘅手勢一定有返咁上下嘅經驗。但令我最意外嘅竟然係一支啤酒，一支雪到接近冰嘅啤酒，以前通常只會大排檔先有，配上㷫烚烚嘅煲仔飯，完美。