南國紅豆餅 (已結業)

太安樓多小食店就人人都知，近月就新開左間賣紅豆餅既小店，好奇既我收工試一試佢。味道除左紅豆外，甜味既重有吉士同香芋，咸既有。。。自己睇相 話明紅豆專賣店，第一次當然係試紅豆味先，如是者等左5分鐘就有得食。(佢廚房係一般小食店既開放式，可以睇住佢點整同埋饀足5足)外觀就係比日本車輪餅細少少，但攞上手手感好軟下，一咬落去都係好軟身，唔乾身，幾好; 可惜我覺得外皮味淡，紅豆餡亦偏淡(雖然用一粒粒紅豆做饀，而且食到有紅豆既原味，不錯，就可惜我個人愛偏甜既紅豆)。簡單總括黎講，鍾意甜既會同我一樣唔滿意，口味偏淡既會覺得不錯。老老實實，宜家咁既時勢，12蚊一個紅豆餅，我覺得都算正路(始終算多饀，但可以降1至2蚊會性價比高多dd),但可惜味道不合我。