泰潮 (嘉咸街) (已結業)

太潮真係中環人嘅恩物，除咗價錢平之外，份量超大，更重要嘅係米芝蓮推薦嘅餐廳。呢度裝修雖然係茶記嘅風格，但係可以睇得出係有放心思將港式風味放入去裝修入面。我哋今晚就揀咗一個二人餐，價錢好抵只係$268 ，已經包左炒雜菜、冬陰功湯、海南雞、白飯同埋油飯、咖喱蝦、泰式甜品。個冬陰功湯係我近年飲過最正嘅冬陰功湯，味道係酸比辣多，味道好適合香港人。個湯仲要好足料，除左蝦，仲有蘑菇、肉丸等等。個咖喱都係比較甜而不辣嘅，配飯一流。入邊嘅蝦超彈牙超滑，而且好離殼，就咁食係絕對冇困難。店主同埋侍應都非常之熱情，雖然我哋今日比較遲先到，但係佢哋都依然熱情招待我哋。要注意呢度夜晚收9點，想食就早啲嚟啦。