尚上下夏 - 養生雞煲火鍋 (已結業)

期待已久的長假期終於來臨, 同事一行4人一早已經約好食雞煲賀一賀去! 4個都係雞煲邊爐怪, 又鍾意食辣, 做晒資料搜集就黎呢間尚上下夏養生雞煲火鍋試下喇. 假期前夕座無虛席, 非常熱鬧, 但店家上菜速度都唔慢. 坐定定好快有得食. 雞煲一上枱已經好香, 配料亦都非常豐富. 我地各有喜好, 於是揀咗半邊淨雞脾, 半邊淨雞胸, 分別係中辣同小辣. 呢間雞煲值得一讚的地方係, 雞件炒得好香口入味, 而且一D都唔鞋口, 尤其係雞脾個邊, 每一件都好滑好入味, 配料亦都好充足, 成個雞煲都好濃味好夠味! 辣度方面一D都唔可以睇小, 小辣個邊初時無乜野我地仲嫌唔夠辣, 一味食中辣個邊, 但慢慢食落先知勁, 個種辣味係越食越辣, 最後大家都食到雪雪聲! 加埋佢有陣好香的花椒麻味, 辣得好有層次, 搞到我地班港女越辣越想食. 食到中段先發現有意外驚喜, 就係--->豬皮, 豬皮係鍋低煮到入晒味, 實在係成個雞煲精華所在 雞煲份量一D都唔少, 食完已經半飽, 下半場打邊邊只能叫D蔬菜同少量肉類黎食, 個個食到攬住個肚!