3 Italiani (已結業)

今日同朋友喺銅鑼灣食完飯，佢話要帶我去食好好味嘅雪糕，仲有我最鍾意嘅開心果味，當然要去試一試啦。但當我行到入呢間專賣意大利雪糕、咖啡同甜品嘅店舖時候，我俾眼前嘅蛋糕櫃吸引左，忍唔住因為一件好靚嘅紅絲絨蛋糕而放棄左開心果雪糕。點知就係咁樣我就中左伏。其實平時我係好鍾意食紅絲絨蛋糕，鍾意中間有幼滑嘅cream，伴上軟綿綿嘅蛋糕，簡直係perfect池。當我用叉吉入去嘅第一下，咦？吉唔入嘅？我已經知道呢舊蛋糕有幾硬，硬過我條命咁硬。呢舊嘢真係唔可以叫做蛋糕，叫曲奇就差唔多。奇怪嘅事，點解咁大力吉完舊曲奇，中間夾着嘅忌廉完全無化開無移位無變形嘅呢？原來都只係我一廂情願以為佢係忌廉，其實佢係我呢世人最憎嘅糖霜。一味得個甜字，咬落仲食到砂糖粒，好似食緊食未吐過沙嘅蜆咁。一個字，難受。但佢個樣真係幾靚，希望佢唔好再恃住個樣去呃人，呢個世界真係好危險。如果你自認重口味，咁你都可以試一試嘅。