瀛喜日本料理 (已結業)

琴日同家人去咗元朗嘅大瀛喜食放題，一入到去環境唔錯，光線幾充足，梳化亦都幾舒服。牆上亦有一幅好和風嘅畫，都幾有氣氛。鍾意飲嘢嘅我入到去梗係叫嘢飲啦，佢嘢飲嘅選擇都幾多，上至可樂、啤酒等罐裝飲品，下至蜂蜜綠茶、烏龍茶等紙包飲品，都好齊全，最特別嘅係佢竟然有新出嘅錫蘭檸檬茶，如果唔想飲凍飲，仲可以飲熱飲，有潤喉清熱嘅柑桔蜜同薑蜜，款式多樣化，任君選擇。我地叫咗好多嘢食，幾乎全部都有試過，包括：刺身、創作壽司、海王翅、手卷、沙律、天婦羅等等，真係非常多，我幾欣賞佢啲手卷，全部都的的骰骰咁，幾啱想嘗鮮又唔想食太多嘅人。另外，我想推介大家食牛油粟米，幾濃味，幾好味，只係份量好似多咗少少。而我最鍾意食嘅就係佢個煙肉包燒蠔，煙肉同蠔嘅味好夾，蠔好多汁，亦好香，呢個菜式亦非常有創意，之前都未見過。另外，甜品雖然選擇唔多，但勝在幾特別，冇係其他放題食過，有雀巢雪糕杯、多種味道嘅雪糕糯米滋，同埋好耐冇見嘅大腳板雪條，簡直係童年回憶，好夠凍。因爲太夠凍，所以我建議大家早啲叫雪糕糯米滋呢癱熱下，等佢融返少少再慢慢品嚐，就唔會太硬而咬唔到啦~