美心MX (冠天閣) (已結業)

睇廣告發現美心最近推出咗主打鮮滑嘅打邊爐，睇完覺得好吸引，心思思就想試下喇。夜晚七點同朋友兩個去食，本身諗住一個叫扒餐一個叫打邊爐，點知...想叫個酥皮湯扒餐嗰陣時店員就話冇曬酥皮湯，問要唔要中湯喎，心諗唔係掛！我都係想食酥皮湯喎，酥皮湯同中湯嘅價錢差一大節喎，點可以咁呀！！所以最後就放棄咗食扒餐，叫咗兩個打邊爐。睇廣告見到鮮滑話好吸引，點知係大失所望！！ 首先，棒棒海鮮鍋王有三條滑，分別係蝦滑，牛滑，同香菇豬肉滑。三條滑都好唔掂，蝦滑放落去煮完之後會散曬， 牛滑就好似食緊山竹牛肉，豬肉滑又冇乜味。三條滑都可以講得上好難食！除咗滑之外其他配料都還ok，好多菜。不過總體嚟講75蚊唔包嘢飲，加上質素唔太好，真係唔抵食！另外個至迷狂牛鍋都還可以，除咗都係條牛話好似山竹牛肉之外，肥牛都算新鮮，唔會好韌，亦都係好多菜，好夠飽。