Mango Tree Kitchen (形點) (已結業)

OpenRice 睇得多，第一次寫食評。唔係好味到震，係嬲到爆….話說母親節正日，帶埋個女去食High Tea慶祝。首先間嘢食物質素唔差，當日tea set $268/ 2位用，連埋加一都係三蚊左右絕對對得上個價錢。可惜食物質素再好，都比個門口Receptionist 破壞晒…當日我1:30已經到餐廳，向門口短髮接待員查詢今日有冇tea set，接待員話有2:30開始，所以我去行陣商場再番嚟。到2:15再到餐廳，接待員問我幾位，我話2位想食tea set。之後接待員再講tea set係要2:30開始，我問是否一定要2:30才可入座，接待員話係，咁無辦法唯有帶住個女又四圍行再等。當時目測餐廳起碼仲有7成座位吉左，門口完全無人排隊。到2:25決定再番餐廳，心諗差5分鐘唔得就門口企，已經唔想再行。點知去到餐廳，竟然全場坐滿仲要等飛。當時我已經嬲嬲地，根本唔洗2:30才入座點解個receptionist死都唔比我入去座。咁我再問職員有冇4人枱，因為小朋友4歲多想坐隔離方便照顧。個receptionist 就話啦： 你想坐4人枱就應該拎4位啦！我回覆咁點解頭先行左2轉都唔比我入？搞到依家無晒位。