士林棧 (已結業)

同朋友行經大角咀，行到又攰又肚餓就隨便搵間餐廳食午餐，去到呢間叫士林棧嘅餐廳，估唔到呢間賣台灣菜餐廳都幾好食同抵食。店入面唔算大，不過枱與枱之間幾寬敞，坐得都幾舒服。餐紙上寫明無添加味精。下午茶餐幾抵食，三十幾蚊已經有一碗陽春麵、米線或者菜飯，仲送熱飲或者豆漿。不過我同朋友想試下呢度嘅招牌菜，所以叫左筋肉雙雄麵同埋五味脆豬扒米線。筋肉雙雄麵，個名好得意，原來係牛𦟌同牛筋，份量都幾多，大大碗，牛肉同牛𦟌有好多舊，生菜都有唔少，牛𦟌幾多肉、牛筋爽口彈牙，牛肉味幾香濃，湯底唔錯，唔係味精湯。五味脆豬扒米線，揀要番茄湯底，又係好大碗，配料都好多，有菜、芽菜同木耳絲，番茄湯味道唔錯，酸甜度適中。豬扒分開碟上，豬扒外皮香脆，入面肉質嫩滑，配甜辣醬汁，食落幾惹味。天氣凍所以我同朋友都揀秋冬暖飲，桂圓薑茶，朋友話味道唔錯，薑茶唔會好辣；我叫嘅蜂蜜檸檬，蜂蜜唔會太甜，幾滋潤。幾有水準嘅台灣菜，而且價錢唔貴，下午茶餐仲幾抵，下次黎開會試下下午茶餐。